آذربايجان ديلي،آناديليم

ديل، جمعيتين ماليدير. جمعيت يوخدورسا، ديل ده يوخدور. انسان جمعيتي ايله ديل بيرگه يارانيب، بيرگه انکشاف ائديب و بوگونگو وضعيته چاتيبدير. انسانلارين حيات طرزي، دونيا گؤروشلري يالنـيز ديل واسطه‌سي ايله آيدين‌لاشا بيلر. دوز دئـييرلر کي، ديل جامعه‌نين گوزگوسودور. ديل ائله بير ميثيل‌سيز اجتماعي حادثه‌دير کي، انسان جمعيتي‌نين الده اولونموش علمي – مدني تجربه‌لريني محافظه ائده‌ر‌ک، اونلاري ياشاتديرير، انکشاف ائتديرير. ديل واسطه‌سي ايله‌دير کي، کئچميش نسيل‌لرين بيليک و تجربه‌لريني اينديکي نسيل منيمسه‌ييب، اؤيره‌نير و گله‌جک نسيل‌لره چاتديرا بيليرلر. بئله‌ليکله اجدادلارلا تؤره‌مه‌لر آراسيندا معنوي کؤرپو يارانير.
ديلين کمکي ايله انسانلار علم، تکنيک و باشقا مدني ثروت‌لري الده ائده بيليرلر. ديلين وارليغي ايله، مدنيت‌لر يارانير. ديلين واسطه‌سي ايله مدنيت‌لر بوتون بشريتين مالينا چئوريلير. يئر کوره‌سي‌نين مليت‌لري، مدنيت‌لري، ديل واسطه‌سي ايله بير ـ بيرلري ايله علاقه ساخلايا بيلرلر. علمي کشف‌لر، بديعي صنعت اثرلري، فلسفي، اخلاقي نظريه‌لر و…ديل واسطه‌سي ايله دونيادا ياييلير. بئله حال‌لاردا زامان و مکان‌لا علاقه‌دار اولاراق ديلين يازيلي شکليندن داها گئنيش استفاده اولونور. جمعيتين علمي – مدني حياتينين انکشافيندا ديل قده‌ر باشليجا رول اوينايان باشقا بير اجتماعي وارليق يوخدور.
هر بير خالقين ديلي اونون، ملي اؤزونه مخصوص‌لوغونون تجسّومودور. او خالقين بوتون مدني کئچميشيني محافظه ائدن ان مهم واسطه، ديل‌دير.
پروفسور آغاموسا آخوندوون فيکيرينجه : » ديل بير چوخ اجتماعي حادثه لردن فرق‌لنير. ديل هئچ بير حالدا عموم بشري اولماييب؛ ديل ملي سجيه داشيييب. ديل بير اونسييت واسطه‌سي، فيکيرين ايفاده واسطه‌سي کيمي مختلف خالق‌لارين، ملت‌لرين ديلي کيمي موجوددور. هر ديلين اؤزونون سجيه‌وي خصوصيت‌لري وار .«
يئر اوزونده، چوخ ملت‌لر، خالق‌لار، قووم‌لار ياشايـير. اونلارين اؤز يوردو، مدنيتي، عادت – عنعنه‌سي اولدوغو کيمي، اؤز ديللري ده واردير. هر خالقين دوغما ديلي اونون » آناديلي « ساييلير. آنا ديلي، او ديلدير کي، انسانلار اونونلا ديل آچير، اونونلا دانيشير، اونونلا ياشايير، اونونلا اؤلورلر.
بيزيم ده آناديليميز، آذربايجان ديليدير. آناميزين بطنينده آناميزين قاني ايله، دويغولاري ايله بيرگه دامارلاريميزدا دولاشيب. اونون سئوگي و محبّتي‌نين ايشيغيندا، بيزيم جانيميزدا کؤک ساليب و دوغولارکن دوداق‌لاريميزدا چيچک‌لنيب، لايلالارلا، نازلامالارلا، بوي آتيب و عؤمروموز اوزونو بئينيميزين، اوره‌ييميزين، ايش‌لريميزين، آرزو و ايستک‌لريميزين ترجماني اولوب. دئمک بئشيک باشيندان – قبير داشيناجان دويغو و دوشونجه‌لريميزين بوتون چالارلاريني قلبيميزين ان درين قات‌لاريندا گيزلنن احتراص‌لاريميزي، هيجان و اضطراب‌لاريميزي تجسّوم و ايفاده ائدير. آغي لارلا، اوخشامالار بيزي سون منزيله تاپشيرير.آکادئميک ميرزه ابراهيم اوو يازير: » هر خالقين آنا ديلي، اونون ملي وارليغينين، معنوي عالمي‌نين ايفاده‌سي‌دير. بئله‌ليک‌له هر ديل بير خالقين، ملتين وارليغيني بيلديرن، قورويان ان مهم عاميل‌لردن بيري‌دير «.
هر بير خالقين، ملتين آنجاق بير آنا ديلي واردير. همين ديل، او خالقين و ملتين عمومي ديلي اولدوغو اوچون، او ديله عموم خالق ديلي دئييرلر. مثال اوچون بيزيم آناديليميز، عموم خالق ديليميز آذربايجان ديلي‌دير. بو ديل، آذربايجان خالقينين معنوي واري، و کيملييي‌دير. عموم خالق ديلي ايکي مهم قولا آيريلير: دانيشيق ديلي و ادبي ديل. ادبي ديل عموم خالق ديلي‌نين ان يوکسک فورماسيدير. داها دوغروسو ادبي معيارلارين، اوسلوب‌لارين واسطه‌سي ايله فيکيرين دقيق، آيدين، سرراست و آنلاشيلان شکيلده ايفاده اولماسينا امکان يارادير.
ادبي ديل، عموم خالق ديلينده، سئچمه، عوض ائتمه، آلينما، ايتيرمه، معيارلاشما عمليات‌لاري نتيجه‌سينده اوسلوب‌لار سيستمينه دوشور. بو عمليات‌لار اجتماعي ـ مدني دييشيک‌لرله سيخ باغليدير. آنجاق هر بير اوسلوب، ديلين ملي خصوصيت‌لري اساسيندا قورولور، تکميل‌لشير.
آذربايجان ديلي انکشاف ائتميش ديللر سيراسيندادير. اونون دا يوکسک کئيفيته ماليک اولان ادبي ديلي واردير.دونيا خالق‌لاري ادبي ديللر واسطه‌سي ايله بير ـ بيرلري ايله ادبي، مدني، اجتماعي علاقه ساخلايير و فيکير مبادله‌سينه گيريشيرلر. بو مبادله‌لرده عاليم‌لر، يازيچيلار، مطبوعات ايشچي‌لري و معلم‌لرين و … بؤيوک رولو اولور. بو ساحه‌ده هئچ کيم خالق ديلي ايله يازيچي و شاعرلر قده‌ر باغلي اولمور. چونکي بديعي سؤز صنعتي‌نين اساسي سؤز اوسته قورولور. سؤز اونلارين هم ايفاده آلتي، هم‌ ده اثرلري‌نين جوهري، ماياسيدير. اونلار سؤزه سويوق قانلي مناسبت بسله‌يه بيلميرلر. سؤز شاعر ـ يازيچي اوچون ديري و جانلي بير وارليق‌دير. اونلار اوچون سؤز چوخ معنالي، چوخ يؤنلودور. اونلار سؤزو بيلير، دويور، لمس ائدير، سؤزون رنگيني، عطريني، چکي‌سيني سئزه بيليرلر و سؤز ياراديجيليغيندا بو قابليت‌دن اولدوقجا يئرلي- يئرينده فايدالانماغي باجارا بيليرلر. پروفسور توفيق حاجي‌يئو چوخ گؤزه‌ل دئيير: »او (سؤز اوستاسي)، سؤز ماتئرياليني يونور، جيلالايير، صنعت فاکتينا چئويرير. اونو اوسلوبي داورانيش اوچون چئويک‌لشديرير، حساس‌لاشديرير.
يازيچي ـ شاعر بو استقامتينده ياراديجيليق فعاليتي‌ني موافق بديعي ـ اوسلوبي ايشله برابر ان چوخ ادبي ديلين خئيرينه يؤنلير… «.
دونيانين بويوک يازيچيسي ماکسيم گورکي‌نين ايفاده‌سي ايله دئسک: »ادبياتين اساس ماتئريالي سؤزدور. بيزيم بوتون تأثيرات‌لاريميزي، دويغولاريميزي، فيکيرلريميزي فورمايا سالان سؤزدور«.
دئمه‌لي: »يازيچينين ان عالي مقصدي سؤزله حياتا کئچير، بديعي اثرين ان يوکسک مطلبي، علوي فيکيرلري سؤزله ايفاده اولونور. «يازيچيلار، شاعرلر و هر هانسي بير فيکير آدامي، قلم صاحبي يوخاريداکي کيفييت‌لري ييه‌لنمک اوچون اؤز نطق مدنيتي‌ني انکشاف ائتديرمه‌لي‌دير.