در حال بار گذاری
امروز: يکشنبه ۲۹ ارديبهشت ۱۳۹۸

فرهنگی > نـوروز بايرامــي

ابو طالب اللهياري ايستي ـ ايستي سئوينج و يام ياشيل گولوش پايالايان نوروز بايرامي بير الينده قارچيچه‌يي، بير الينده نوروز گولو، گؤزه‌ل، گؤيچک اؤلکه‌ميزه قوناق گلير.

       موشتولوق وئردي شحر يئللري دور ياز گلير
    آچ کؤنـول شعـر و غزه‌ل دفتـريني ياز گلير
     ايستي ـ ايستي سئوينج و يام ياشيل گولوش پايالايان نوروز بايرامي بير الينده قارچيچه‌يي، بير الينده نوروز گولو، گؤزه‌ل، گؤيچک اؤلکه‌ميزه قوناق گلير.
    بيلديينيز کيمي اودلار يوردو آنا وطه‌نيميزين باشاـ باشيندا، اولدوقجا قوناغي عزيز سانيب  حؤرمت ائدر، سايقي گؤستره‌رلر، بو گؤزه‌ل گله¬نک و عنعنه‌لرله اوره‌کلري اوخشايان نوروز بايرامي ائراميزدان اؤنجه، ان قديم و کؤهنه چاغلاردان بري اينسانلارين وريندن اودوقلانميش و قوتلانميشدير ائله‌جه اسلام ديني‌نين گؤرکملي ائلچيسي محمد»ص« حضرتلري ايسه همين بايراما قول قويموش و بوگونده مؤمون مسلمانلارا گؤزه‌ل و اينسانسل بويوروقلار اوجومله‌دن، دوشمانچيليق، کين  کدورته سون قويماق، صلح و صفا و باريشيق  اينسان سئوه‌رليک، خسته‌لري يولوخماق، اقربالارا  يوخسوللارا، کيمسه‌سيزلره صله وئرمک  پاخيلليقلاردان، گؤزودارليليقدان، قيسقانجيليقدان  ياراماز ايشلردن اوجقارلانماق، اوره‌ک گوزگوسونو سيليب، پاکلاماق، اولو ياراداندان يئني ايلده ساغلامليق، ياشيل ياشاييش، بول ـ بول نعمت‌لر ديله‌مک و... وئرميشدير.آرتيرمالييام کي  بو قوناق(نوروز بايرامي يا خود ايل بايرامي)  آديندان به‌للي اولدوغو کيمي باشقا قوناقلاردان فرقيلي‌دير، چونکي»بايرام = به‌ي، باي + رام«، (گونلرين به‌يي، بؤيويو، گنجي) چالاريني داشيير.
    بو قوناق، سئويملي اؤلکه‌ميزه شئنليک، سئوينج ياياجاقدير، بو قوناق چانتا ـ چانتا، قولتوق ـ قولتوق، قوجاق ـ قوجاق چلنگ و پوتگا ـ پوتگا عطير سَپَرکن، لاله‌لرين آياغيندا، اَسره‌ديجي آل ايره‌نگ‌ده مئي وره‌جک، بو قوناق داغلارين آغ کؤينه‌کلرين سويوندوروب، يام ياشيل دون گئيديره‌جه‌ک، بو قوناق زيل قارانليقلار، سازاق  شاختا کؤچون چاتسين، دئيه، اوره‌کلري ايسينديرن آلتين ساچلي، گونش، ياشيل ياشاييش  اوغورلو، آيدين گله‌جکلر گتيرير.
    نوروز بايرامي بوسبوتون کوسن‌لري باريشيديريم دئيه، اولوس آرا، ائللر ايچره صلح و صفا، سئوگي، سئويم، ايستي ايستک، اينام، اومود و... سونور.
    آيلارلا دؤزومسوزلوکله يولونو بکلله‌دييميز سئوگيلي قوناق يئني ايل، يئني ياشاييش، ايستي گؤروش، درين دويغولارين ترنّمو ياشيل يازين موشتولوقچوسودور.
    پاييز فصيليندن بري گؤم گؤي ياپراقلاري و آل الوان گول چيچکلري اپريميش، بولبوللري سويوق قيشين شاختاسيندان، سازاغيندان باشلاريني قينلارينا چکميش، ائله‌جه‌ده، غم نغمه‌سيني ترنم ائدن باغ، باغچالارين، چيمن‌لرين، تارلالارين  اورمانلارين، آغاجلاري‌نين آغ آپباغجا فيدانلاشماسي، حاصارسيز هاوانين ايپک تکين يوموشاقليغي، سحر نسيمي‌نين طراوتلي نفسي هابئله يئرين قارا قيش دا بوز کيمي دونموش باغري‌نين ايسينمه‌سي، بوز چيچه‌يي‌نين قارين آلتيندان بويلانماسي و... بوسبوتونلوکده نوروز بايرامي يا خود اوغوز بايرامي و يئني ايلين يولدان گليب، چاتماسيني موشتولوقلايير.
    باخ،داغلار آغ آپباغ گئييم‌لريني ده‌ييشديکده  سانکي اونلاردا اينسانلار کيمي آچي‌نين دَريزي‌سينه يئني گئييم بيچديريب، تيکديرميشلر.
     يئري گلميش‌کن دئمه‌لييم¬کي، اولو و ويقارلي داغلار نئچه اوزلو اينسانلار ساياغي، گونده يئددي رنگه دوشمه‌دن، يالنيز ياشيل دونلاريني گئيرکن  فخر ائده‌ر، باشي اوجا، ياشايارلار. بورادا، اؤلمز شاعير بولود قاراچورلودان، داغلارلا ايلگيلي شعيريندن پارچالار تقديم ائتمه‌ييمي يئرسيز گؤرمورم:
    اي باشي دومانلي قوجامان داغلار
    سيزلرده نه معنا، نه سير وار مگر؟
    گونشدن قوپان ايلك آلتين شعالار
    سحر ـ سحر سيزين آلنيزي اؤپر
    سيز سؤنن اودلارين مناره‌سي‌سيز
    سيزلره ياراشير عظمت، ويقار
    اوجاليق، علويّت نشانه‌سي‌سيز
    سيزده تؤيشون آلير اسن روزگار
    دئييرلر باغرينيز قايادير، داشدير
    يوخ يالنيش فيكير‌دير، اوره‌ك داش اولماز
    سيزين‌ده ايچينيـز آليشيـر، يانيـر
    اوره‌ك يانمايينجا، گؤزده، ياش اولماز
    سيزي تانيميشام، سيزي آنميشام
    بولاغلاردان آخان گؤز ياشينيزدان
    نه‌لر دوشونموشم، نه‌لر قانميشام
    اَييلمك بيلمه‌ين آغ باشينيزدان...
    دئمک بوتون يارانميشلار طبيعتدن الهام الاراق؛  ياشيل دويغو، ياشيل دوشونجه، ياشيل باخيش و ياشيل ياشاييشا مالک اولمالي‌ديرلار.
    گئرچکدنسه اينسان اوغلو قوجاليرسا، اوره‌کلره سئوينج و دوداغلارا گولوش ساچان بايرام سؤزونو دينله‌ديکده، کؤرپه چاغلاري‌نين بايرام گونلريني خاطيرلاريير، ائله‌جه‌ده، کئچميش گونلري گؤز اؤنونده جانلاناراق، عؤمور کرواني‌نين اؤتدويو يوللاردا مات قالير.
    او، خيال کؤهله‌نيني سَکديره‌رکن، آيلاري، ايللري گئريده قويور، اوشاقليق دؤنگه‌لرينده ايتيرديي آجيلي، شيرينلي خاطيره‌لري، سين ـ سين آرايير. رحمتليک سهند دئميشک:
    خياليم سيچراييــر آتين بئلينه
     باخيشلاريـم جيلو، گؤزلريم يوين
    يورتيرام کئچميشين درينلرينه
     چاپاراق، چيخيرام زامان قئيديندن...
    دوغما يوردومون هر قاريجيندا مين‌لرله خاطيره‌لر ياتميش، آذربايجان فولکلوروندا بايرام آيي و گونلري ايله ايلگيلي ان چوخ گؤزه‌ل رسم‌لر، عنعنه‌لر، اويونلار، دئيم‌لر، گؤروم‌لر  متل‌لر، مثل‌لر واردير کي، اونلارين هاميسيني کؤرپه چاغلاريمدا دوغماجا کنديمده گؤرروب  دويموشام، باشقا سؤزله دئسم، اولاري من ياشاميشام.
    بيلديينيز کيمي ايلين باشقا آيلارينا تاي، بايرام آيي‌نين ايسه دؤرد چرشنبه‌سي واردير آنجاق بايرام آيي‌نين چرشنبه‌لري‌نين اؤزه‌ل آدلاري و آدلاري ايله ايلگيلي، اويغون رسم‌لري و... واردير.
    ان بيرينجي چرشنبه‌يه »خبرچي يا خود سو چرشنبه¬سي« دئيرلر بو، چرشنبه‌نين آديندان به‌للي اولدوغو کيمي، بو گونده اوشاقلار، يئني يئتميش‌لرجئيران شکيلينده بير کوکلاني اللرينه آلار، اونا»تکم« دئيه آد وئريب بوينونا زينقيروو و دمير پول باغلايار، اويناداراق، کوچه‌لرده بو شعيري اوخويارلار و قاپي¬لاردان بايرام گلدي، ياز گلدي سؤيله‌يرکن موشتولوق آلارلار:
    بو تکه چوخ اويـون ائدر قوردونان قول بويون ائدر
    يغار ايرانين دويوسون
    چَپيشين تويـون ائدر
    بـوتـکه، ‌آختاتـکه بويونوندا نوختا تکه گاه قول اولار ساتيلار گاه، چخار تاختاتـکه
    تکم گئتدي مرنده تاماشادي گلنـده کول تکمين باشينا قاينـاناسي بيلنـده
    اريسين داغلارين قاري
    تؤکولسون چايلارا باري
    بير يومورتدا ندير قاري
    وئر آلله اوغلون ساخلاسين
    ايمام کمرين باغــلاسين
     تکم گئتدي خانليغا
    اوز قويدو يامانليغا
    اؤلدوردولر تکمـي
    آتـديلار سامانليغا
    آخير چرشنبه:
    آي تکمين کندي وار کمندي وار کندي وار هـر قاپي دا اوينـاسا بيـر نلبکي قنـدي وار
    تکم اولدي ايپين گتير آي خانم چاتديغجان يوکين گتير آي خانم کسمه پائين بوتون گتير آي خانم...
    و هابئله آشاغيداکي سرودي اوخويارلار:
    تکم ـ تکم، اوش تکم
    بيزيم باغا دوش تکم
    تکم گئتدي اودونا
    تيکان باتدي بودونا
    ايکي خوروز ساواشدي
    بيـــري قانا بـولاشدي
    چاي دان گؤيرچين اوچدو
    گـــــؤيرچين، آلاپاختا
    يوواسي قلبــــي داغدا...
     سو ديريليک، تميزليک، ساغلامليق  خوشبختليک،...، حيات سيمگه¬سي¬دير ائله¬جه¬ده  آي ائو تؤکنلر، پالتار يويانلار، آي حيات قورما آرزيسي ايله سويا اوزوک سالان قيزلار، آي گنج اوغلان، قيزلارين فالينا باخان فالچي قادينلار، آي آغير يورغان دؤشکده ياتان خسته¬لر، آزاريني  بئزاريني سويا آخيدانلار آي آغيرليغيني  اوغورلوغونو سويا چکن قادينلار، آي سمني قويان قادينلار، آي يئني سويو قارشيلايانلار، آتيل  ماتيل چرشنبه...آرزيسي ايله سو چرشنبه¬سيني گودن اينسانلار، آي ايلين سون چرشنبه¬سينده اريشته پيلوو بيشيرمه¬لييک دئييب، بو گون (ايلک  ازه ل چرشنبه)، »سو« چرشنبه¬سي گونودور  هايدي  خمير ائله¬ييب، اريشته کسمه¬لي¬سينيز، آي سو حووضلاريني تعمير ائتمک ايسته¬ينلر، آي  آرخ چيخاران، آرخ آريتلايان آغالار، آي سويو قوتسال، اودوق(موبارک)سانانلار، هايدي اوزونوزه سو چيله¬ييب، سولاشين...آي سو حياتددير دئيه اونو ليللتمه، دئين، شئنليک ائده¬نلر  هايدي سو چرشنبه سي گلميش، اونو قارشيلايين  آي سويو، ساغلامليق سيمگه¬سي ساناراق، اوندا چيمن¬لر، آي »گؤي« بئجرنلر، هايدي تله¬سين سو چرشنبه¬سي¬دير.آي سو تانريسي ساييلان »آبان« و »يادان«نين شرفينه  ماهني¬لار اوخويانلار، آي »سوفره¬ده سو داغيلارسا آيدينليق¬دير دئين-لر«، آي »سو اولان يئرده، ديريليک وار«، »سو احساندير«، » سو ميردارليق گؤتورمز«، » سويو چيرکاب ائدنلرين  نعشيني يوماق اوچون سو تاپيلماز«... دئين¬لر، يئني سو گلير، سو چرشنبه¬سي¬دير. آي »سودان گلن سورمه¬لي قيز...«دولدور کوزه¬ني بولاغلار گولور...
    ايکينجي چرشنبه »اود« آدلانميشدير. دئمک  نوروز يا خود ايل بايرامي يارانيشين دؤرد ( سو  اود، يئل، توپراق) اولونتوسو ايله باغلي تؤرن  مراسيم¬لرين قيد اولونماسي گله¬نک، عنعنه¬لريني اؤزونده توپلاييب، بيرلشديرير.
     ايلين بوز آيينين چرشنبه-لريندن ايکينجيسي »اود« چرشنبه¬سي¬دير  اود چرشنبه¬سي قديم اينسانلارين گونشه، اودا  بسلنميش اينام  اينانجيلاريندن ايره¬لي گلير. گلنه¬ک عادت  عنعنه¬لردن دولايي، بو گون داملار  کوچه¬لر  مئيدان¬لاردا تونقال قالاييب، چئوره¬سينه گيرده جيزگي، جيزيق چکديکدن سونرا بوتون پيستيکلر، آزارلاردان پاکلانيم دئيه اودون اوزه¬ريندن آتيلارلار.
    اوچونجو »يئل يا خودکول- کوله،کولک« چرشنبه‌سي‌دير يئل يا خود کولک- کوله چرشنبه¬سي گونونده اساساً ايستي، يوموشاق يئل ياشيل يازين يولدان گليب، يئتيرمه¬سي، لاپ بئله آستانادا اولماسيني موشتولوقلايير بو چرشنبه ايل آخير چرشنبه¬لرين اوچونجوسودور، کوهنه چاغلاردان بئله خالقيميزين اينانجينا گؤره بو گونده آييلان يئل، اويانميش سويو، اودو حرکته  جوشقونلوغا گتيرير، شيفاهي خالق ياراديجيليغيندا يئلين گوج، فايدا اؤزه¬لليينه اساسلاناراق، شامان، تانري اولماسي ايله باغلي چئشيتلي دئييم¬لر، افسانه¬لر، اينانجلار، نغمه¬لر  مثللر،.. يارانميش، ديلدن- ديله دوشموش، بو گونوموزه گليب چاتميشدير. بايرام شينليکلرينده اجرا اولونان اويونلار، مراسيم¬لردن بيريسي »يئل بابا« مراسيمي¬دير:
    آي يئل بابا، يئل بابا،
     تئز گل بابا، گل بابا،
    سوور بيزيم خيرماني
    آتينا وئر سامانــــــي
    ده¬ن داغيليب، داغ اولسون
    منيم کئفيم ساز اولسون
    آي يئل بابا، يئل بابا
    قوربان سنه، گل بابا
    اساساً يئل اسمه¬يينجه خيرماندا بوغداني، ده¬ني ساماندان آييرماق اولماز دولاييسي ايله اوسته¬کي نغمه¬ني اوخويار، يئلين گلمه-سيني گؤزلرلر.
    يئل چرشنبه¬سي گئجه¬سي باغچادا سؤيود آغاجي¬نين ديبينده اوتوروب، نييت ائدينجه، يئل باباني چاغيرارلار، يئل بابا اسيب، سؤيودون بوتاقلاريني، توپراغا توخونودورارسا، آرزيسي يئريني آلاجاقميش دئمک.
     بو گونون ايسه اؤزونه گؤره اؤزه‌لليکلري و عنعنه¬لري واردير مثال اوچون بو، چرشنبه‌ده کند اهاليسي پاييز و قيشين آغيرليغيندان چيخاردان حئيوانلاري اوجومله‌دن آت، قاتير، اؤکوز، اينک  تويوق خوروز وس...کوله‌ييم دئيه، اونلارين ياللار و قويروقلاريني و قانادلاريني قيساردارلار، چوبان  چولوق ايسه قويون، قوزولاري يئني يازلا گؤروشدورمک و يئني‌دن ياشيل يازايله تانيش اولماق اوچون، دئمک طبيعت‌له دوموک اولسون دئيه سوروله‌ريني کندين ياخين باغچالاري و خيرمانلارينا آپاريب، خامدان چيخارارلار، هابئله گنج و آداخلي اوغلانلار داللاکا مراجعت ائده‌ر  باشلاري‌نين توکلري خصوصيله تئللريني قيسسادارلار.
    درردونجو چرشنبه »سون چرشنبه« يا خود »توپراق چرشنبه¬سي« آدلانميش، توپراق، اينسان يارانيشي¬نين اساسي، ماددي تملي اولماق اعتيباريله بو سورجده، ان اؤنملي بير مقاما ماليکدير، توپراق چرشنبه¬سي، توپراغين اويانماسي¬نين ميفيق کؤکلرينه داياناراق ديريلمه  جانلانما آنلاييشي ايله ايلگيلي¬دير. آخير، سون چرشنبه¬ده تونقال قالانما، پيلو بيشيرمه، سمني قويما، خونچا آپارما، نييت ائديب، قاپي يا خود دامين باجاسي¬نين قيراغيندا بوساراق، دانيشيقلارا قولاق ياتيرما، دينلمه، فالا باخما، ياسلي¬لاري  ياسدان چيخارما،...عنعنه¬لري واردير. سون چرشنبه‌نين باشقا چرشنبه‌لردن داها آرتيق و چئشيتلي اويونلاري، عنعنه‌لري، رسم‌لري  دئييم‌لري، دويوملاري و...واردير، مثال اوچون بوگونده آذربايجانين بوتون کند و شهرلرينده اولدوغو کيمي، بيزيمده کندده آداخلي اوغلانلار نشانلاديغي قيزين ائوينه »چرشنبه پايي« دئيه، يالديزلي خونچا گؤنده‌ره‌رلر، خونچادا گؤنده‌ريلن گؤروملر بونلاردان عبارت اولار خينا، گوزگو  داراق، ديزليک، يايليق، شال، س... آرتيرمالييام کي  سون چرشنبه بلکه‌ده بوتون چرشنبه‌لري کندچيلر  شهرلي‌لردن داها طنطنه‌لي توتارلار اؤرنک اوچون آخير چرشنبه‌ده، کند ايچره رسمي‌دير کي، آداخلي اوغلانين ائويندن قيز ائوينه گؤزه‌ل گؤيچک بزه‌نميش بير قوچ گؤنده‌ريلر، سون چرشنبه گونو ايسه، سو چرشنبه¬سي کيمي، يارين تئزدن، ارليک قيزلار بولاغ باشي يا خود چاي قيراغينا گئده‌ر  باختيم آچيلسين دئيه، سويون اوستوندن آتيلاراق:
    آتيل ماتيل چرشنبه،
     آينا تکين باختيم آچيل چرشنبه
     دئييميني زومزومه ائده‌رلر.
    هابئله آخشام چاغي قيزيل گونش آلتين ساچلاريني باشيندا توپلاييب، يورغون آرغين اوفوقو آشارکن داملار و کوچه‌لرده تونقال ياخار، قادا بالا يانار اوددا يانسين دئيه، آلاوين اوستوندن آتيلارلار و اودون چئوره‌سينه جيزيق چکر، بو دوعاني اوخويارلار:
    آغيرليغيـم- بيغيـرليغيم بوردا قالاسان
    ديش آغريم، باش آغريم بوردا قالاسان
    قيرميزيليغين منيـــم، ساريليغيم سنين
     قورشاق آتماق: بايرام آخشامي اوشقلار، يئني يئتمه‌لر، گنج‌لر، خصوصي ايله سئودايه توتولانلار  قورشاقلاريني گؤتوروب اوره‌گينده توتدوغو  سئوديي قيزين ائوينه قورشاق آتماغا گئدير. قاپيني آچيب اؤزونو گؤستر‌مه‌دن قورشاغي ائوه آتير. ائو ايئه‌سي، گوجو چاتديغي قدر قورشاغا بير آز پاي باغلاييب قاپيني آچيب اونو چؤله قويور و قورشاق ساللايان اؤزونو گؤسترمه‌دن قورشاغيني گؤتوروب گئدير.
     دامين اوستونده باجالار اولاردي گؤره‌ردين قورشاق آتماغا گلن، قورشاغي ايپ ايله ائوه ساللادي. بو ايشه گؤره قورشاق آتماغا چوخ يئرلرده او جومله¬دن بيزيم کندده شال ساللاما و دسمال آتدي‌دا دئييرلر.
    آرادا بير قيزي سئون بير اوغلان، قيزي آلماق فيکيري ايله قيز ائوينه قورشاق آتماغا گئديردي. بئله‌ليکله اوغلان تانينميش شال- دسمال، پاپاق يا باشقا بير پارچا گتيريب قيز ائوينه آتاردي. قيزي اونونلا ائولنديرمه‌گه کؤنول وئرسَيديلر اونون شاليني ساخلايارديلارآنجاق، قيزي وئرمه‌گه کؤنول وئرمه‌سه‌لر، پاپاغي قايتارار، دسمالين(شالين)، قورشاغين، دويونونو آچمادان بير آز پاي باغلاييب گئري وئررديلر.
    شهريار دئيير:
    بايـراميدي گئـجه قوشو اوخـوردو
    آداغلــي قيز بَي جورابين توخوردو
    هر کس شالين بير باجادان سوخوردو
    آي نه گؤزل قايدادي شال ساللاماق
    بَي شالينا بايرامليغين باغــــلاماق
     شال ايسته‌ديم من ده ائوده آغلاديم
    بير شال آليب تئز بئليمه باغـلاديم
    قولام گيله قاشديم شالي ساللاديم
    فاطمـا خالا منه جوراب باغلادي
    خان ننه‌مي يادا ساليب آغلادي…
    ايل تحويلينه ايكي ـ اوچ ساعات قالميشدان قونوم ـ قونشولار بيريسي‌نين ائوينه توپلاناركن، چهل ياسين دئيه، بير بؤيوك قابي سوايله دولدوروب، اورتاليغا قويار، چئوره‌ده‌كي‌لردن كيمسه قرآن مجيدين اوخوماسيني باجارارسا، قرآني آچيب، موباركه ياسين سوره‌سيني اوخويار، هربير كره ياسيني تاماملاديقجا، «هفت سين» سوفره‌سيندن بير ايده گؤتوروب، سويا سالاركن، پوفله‌ير، آذربايجانلي‌لارا گؤره كمسه چهل ياسين سويوندان بير ايچيم ايچرسه، ايلي باشاـ باش ساغلامليغيني الده ائده بيلر، ائله‌جه‌ده، ايل تحويليندن سونرا قيرخ ياسين اوخودوقلاري سودان شفا دير دئيه ايچرلر.
     بايرامين ايلك گونو اؤنجه ياسلي‌لارين ائوينه گئديب، فاتحه وئرندن سونرا، گلن گونلرينيز خئيرلي اولسون دئييب، اونلارا توختاقليق وئره‌رلر، هابئله كيچيكلر، آغ ساققاللار و آغ بيرچكلرين گؤروشونه گئديب، اونلاردان بايرامليق آلارلار، بايرامدا هئچ بير ائوده كوسولو قالمامالي‌دير، دئمك بو گونده هامي كوسولولر باريشمالي‌ديرلار، بايرام گونلرينده آرتيق:
    »... كينه‌‌ني، كوسونو آتيب، اونوتماق
    سولارا آل الوان باليق بوراخماق«
    ايلين تحويلينده دوعا اوخوماق :
    »اي كؤنو، كؤنوللري يارادان،
    اي گؤرن گؤزلره ايشيقلار ساچان،
    گئجه‌لري، گونوزلري فيرلادان،
    اي دونياني حالدان ـ حالا چئويرن.
    ايل دَييشن كيمي قول، بويون اولماق،
    ال سيخماق، بايرامين موبارك دئمك،
    ائو به ائو دولانماق، گؤروشه گئتمك
    بايرامليق آپارماق، شيرينليك يئمك...
    بو هامي ماراقلي عنعنه‌لردن
    معنالي رمزلر آختارماق اولار
    هر بيري آچيلسا، آراشديريلسا،
    بير چوخ آچيلماميش دوگونلر آچار
    بو عادتلرين ان گؤزه‌لي منجه،
    اؤلوب، گئدنلري خاطيرلاماقدير
    هركس عزيزيني، حؤرمتلي‌سيني
    زيارت ائيله‌ييب، يادا سالماقدير...«
    سؤزومه ملا پناه واقفين، بايراملا ايلگيلي شعري ايله سون قويوب، بايرامينيزي قوتلاييرام.
    بايرام اولدو، هئچ بيلميرم نئيله‌ييم
    بيزيم ائوده دولو چووال دا يوخدو
    دويو ايله ياغ هله چوخدان توكنميش
    ات هئچ اله دوشمز، موتال دا يوخدو
    آللاها بيزيميشيك ناشوكور بنده
    بير سؤز دئسم داها، قويمازلا كنده
    خالق باتيب نوغولا، شكره، قنده،
    بيزيم ائوده آختا زوغال دا يوخدو
    بيزيم بو دونيادا نه مالي‌ميز وار
    نه ده ائوده صاحب جامالي‌ميز وار
    »واقف« اؤيونمه‌كي، كامالي‌ميز وار
    شوكر اولا آللاها كامالدا يوخدو.

نظر خود را بنویسید ...

نظر سنجی