در حال بار گذاری
امروز: پنحشنبه ۲ ارديبهشت ۱۴۰۰

اجتماعی > بايرام توزو

نيگار خياوي آناديليميز:بوگون ديکدابان خانيم سحرين آلاتورانيندا، جين وورموشلار کيمي ياتديغي يئردن ديک آتيليب ديکدابانيني ياغلاييب چکدي آياغينا. اوجا سسله اؤزو اؤزونه: “بوتون قاپي- قونشوموز، ساغيميز- سولوموز بايرام توزونو تؤکدو چيخدي يانا” دئدي ” هله بيزيم توزوموز تورپاغيميز اوستوموزده باشيميزدا قاليب کي قاليب.

     آناديليميز:بوگون ديکدابان خانيم سحرين آلاتورانيندا، جين وورموشلار کيمي ياتديغي يئردن ديک آتيليب ديکدابانيني ياغلاييب چکدي آياغينا. اوجا سسله اؤزو اؤزونه: “بوتون قاپي- قونشوموز، ساغيميز- سولوموز بايرام توزونو تؤکدو چيخدي يانا” دئدي ” هله بيزيم توزوموز تورپاغيميز اوستوموزده باشيميزدا قاليب کي قاليب. آي جانيم بو جان کي مندن چيخماليدي، قوي ائله بوگون جانيمي آليم ديشيمه، قاتلاشيم ايشيمي گؤروم داينا” و ال ائلهدي تور سوپورگهسينه. اونو دا دئييم ها، ديکدابان خانيم دابانينين ديکليييني بو تور سوپورگهسينين اوزونلوغونا قاتاندا ائو بوجاغينين قوروم قاراسي ندي، لاپ گؤي ا?زونون قارا بولودلاريني دا سيليب سوپوره بيلر آجيغي توتسا.
    هه... ديکدابان سوپورگهني گؤتوروب تاواندا تور- توز باسميش بوجاغا توشلاييب هؤرومجهيين توخودوغو شئيطان تورولاريني بولديزئر کيمي يئرلي ديبلي سؤکمهيه باشلاماق ايستهديکده گؤردو خئير، دوردوغو يئردن ايينه اوجويجا دَبرمهيه قادير دهيي. ها گوجندي، ها وورنوخدو، ترپشنمهدي. ائلهبيل قول قاناديندان داش قيفيللار آسلانميشدي. بيرداها گوجندي، بيرداها دارتيندي، گؤردو نه الي اؤزونوندو، نه آياغي. ديکداباني خوف گؤتوردو. باغيرماق ايستهدي، گؤردو ديلي آغزيندا دولانمير. بوغازينا قورقوشوم اريتميشديلر ائلهبيل. داي بونو يئيه بيلمزدي ديکدابان. آخي او، سايري واختلاردا دا، حتا اؤز- اؤزونه دانيشاندا دا اوجا- اوجا دانيشاردي. ياستيدابان اَري نئچه يول اونو تپرله ميشديکي: ”» ائله آروادين انگي ايشلير هاااا… آت باشوندان آرواد بو اؤز- اوزووه دانيشماغيوي، جاماعاتي اؤزووه گولدورمه! ”«
    _” آي کيشي کيمه نه وار “ديکدابان دئميشدي” فيکيرلريم باشيما اوجا سسنن گلير. کئفيم بئله چکير، بوي ي ي … اؤز ائويمده ده قويميياجاقسان؟ کئفيم چکير ائي ي ي بئله نه دئييرسن؟”
    _”آلله آمان آرواد اليندن…” ياستيدابان دئميشدي ” قازان قابلاماينان دانيشير، سوي نان چؤرهينن دانيشير، سوپورگه ينن دانيشير، قلم کاغيذنان دانيشير، ايشه قالميشيق هاااا…
    بوتون تفاهملي اَر آروادلار کيمي ديکدابانلا ياستيدابانين دا بئله- بئله کئف گئتديلري چوخ اولاردي. بيزيم نه ايشيميزه؟
    هه… ديکدابان قالميشدي دارتينا دارتينا. جانييلا اللشيردي. قورو ديرک کيمي يئره سانجيلميشدي ائلهبيل. بوغازي تيخانميشدي. ديکدابان، ديکباش، ديکباخيش اولاسان، آما نه باغيرماغا نه ده ترپشمهيه گوجون اولمايا؟ گؤرونموش بير شئي دئييلدي ديکدابان خانيمين تاريخينده بو. ايندي ده بايرام توزو تؤکه- تؤکه لاپ بئله اورهک ائويندن اؤزو- اؤزونه دانيشيب دئيينمهيي توتموشدو، اودا کي بئله اولموشدو.
    زور بالله، بير تهر باشيني اَييب اوست باشينا باخدي. نه گؤرسئيدي ياخشييدي؟ شيريم- شيريم هؤرومجک تورو ايدي کي اوست باشيندان آسلانميشدي. هؤرومجکلر، تور آتانلار، شئيطان تورولار قوشون- قوشون بوتون بور بوجاقلاريندا پؤهره لنيردي. ال قاتدي باغيرا کي: ” بوي باشي داشلي جانيم، بو نه اويوندو منيم باشيما گلدي، هاچاندان بئله اولموشام خبريم اولماييب” گؤردو خئير، جاني چيخير سسي چيخمير. گون اورتا اولموشدو، بيرده گؤردو اَري قولتوغو دولوسو تره – تورهيله گيردي ائوه: “جانيم ديکدابان” دئدي ” بويون ايشين- گوجون چوخدور، پيشميشيميزين يانيب کوله دؤنمهسي باشي اوستوندهدي، اونا گؤره چيققان آش گؤيو آلديم کي، بيرآز دووغا پيشيرهسن. نه يانماسي وار، نه ده قازان ديبي سورتمهسي. سن ده راحات بيز ده راحات” دئييب و قولتوغونداکي گؤيو ميطباغا قويوب، هاوايا چيتمک آتا-آتا ديکدابانا ساري دؤندو. بو حئينده ديکدابان ائله دريندن ايچيني چکيب اودغوندو کي، نفسي دوز دابانينا دَييب دوداغينا قاييتدي. هاندان هانا اؤزونه گلدي. ديلي بيردن آچيلدي:
    “ددهمين خئيري اولسون!”، دئدي، ” کيشي نين اوغلو!، منيم باش قاشيماغا ماجاليم وار هئش ائوين ييخيلماسين؟… هله بير دَريز آش تَرهسي ده ووروب قولتوغووا نيققانا نيققانا گتيريبسن… به گؤرمورسن نه کؤکده‌يم؟”
    ياستيدابان قاغا ديکدابان خانيمي او کؤکده گؤردوکده ديلي دولاشيب اؤزونو ايتيردي:” بئله قادالارين گلسين قويون- قوزولاريميزا ديکدابان!” دئدي ” سنه نه گلدي گؤزومون ايشيغي؟ سن دوشمانا ديديلن دئييلدين آخي.”
    ديکدابان تؤشکويه تؤشکويه شئيطان تورولاريني اوست باشيندان ديديشديره ديديشديره چيخديکي:
    ” خبرين يوخدي خبردن کيشي. آلله مني سنه تزه دن وئردي… دئمه ائودن قاباق اؤزومو قوروم باسيبميش. سحردن اَللشيرم آنجاق اؤز قورومومو آزجانا تؤکه بيلميشم. هله سن ياخجي گونومو گؤرورسن. بوتون بور- بوجاغيم شئيطان تورو ايدي اِ شئيطان تورو… و بيردن بيره گؤزلريني بَرهلديب ياستيدابانا ساري يويوردو:
    “بوي، کيشي سن مندن ده پيس گونده سن کي! بو هؤرومجکلرين آلتيندا نئجه نفس آلابيليرسن؟” سونرا تور سوپورگهسيني آليب دوشدو ياستيدابانين جانينا : ” سن اؤزونسن ياستيدابان؟ ديللن گؤروم. باشيما خئير، کيشي نين هئش تانينماليسي قالماييب. بوي ي ي… بيزه بو داش هاردان دهيدي بيلمهديک. بو نه اويون، بو نه پستاه دي بيزيم باشيميزا گلدي. کيم بيزيم تيفاغيميزا سوخولدو. کيم بيزيم جيلديميزه گيردي. کيم بيزه اويون اوينادي. کيم بيزيم اوجاغيميزي سؤندوردو. کيم بيزيم آشيميزا سو جالادي. کيم بيزي بادادي. کيم بيزه جله قوردو. کيم بيزي اويناتدي. بيزي کيم يازدي، کيم پوزدو. يوخولاريميزي کيم يوزدو…... کيم بيزي…... کيم... … کيم بيزه…... کيم …...

نظر خود را بنویسید ...

نظر سنجی